شعر العامية
كان ياما كان بقلم الأستاذة ياسمين محمد
كان ياماكان.
كان ياماكان
كان فيه زمان
حاجة اسمها راحة البال
يتغنى فيها مليون موال
كان الأب بالشغل شقيان
والمغربية محمل للعيال
أصناف وألوان
والحب بالمكيال
والأم بضحكتها
تقابله مبسوطة
ويعاملها زيهم ظغنطوطة
ويمد إيديه الإتنين
ليها الشقيانين
ويجمعوا على الطبلية
وياكلوا لقمة هنية
ويقوموا يلعبوا فرحانين
يالا يامحمد نادي ياسمين
مين اللي عليه الدور
مفيش زعل الكل مسرور
وآخر الليل حدوتة
تجمعنا بفرحة وسعادة
وتقولنا حلوة ولا ملتوتة
إتعودنا عليها ماهي عادة
ولما كبرنا اتحسرنا
على أيام راحت مننا
ماهي الدنيا بتحاورنا
وأكيد فاكرينها كلنا
وكان ياماكان
بقلمي ياسمين محمد.
ليست هناك تعليقات:
إرسال تعليق